العراق ذكريات ما منسية

Naaareey الثلاثاء أكتوبر 23, 2007 10:00 am

العراق ذكريات ما منسية

منين ابدي حبي للعراق شلون اوصف طفولة عراقية
المراجيح ولبس العيد وسهراتنا للصبحية
*****************
تذكرون طعم الصمون القيمر - البقصم - بالصبحية
تذكرون المبردات ريحة العشب منها يفوح وصوت المي من الصوندات ينقط عا الارضية
*****************
شقول لاولادي من يكبرون ششرح - شؤوصف كلشي ماله اهمية
اذا يتربون غربة لا اهل - لا بلاد لا اصل - لا جنسية
*****************
الله , الله يا عراق ذكرى كل غريب ببلاد غربية
نومة السطح - يا الله حتى السما جانت وردية
*****************
كلما نسمع واحد مات واحنا بغربة نلتم نتكاتف - خوف ورعب - ننهار وكلمن يقول بنفسة بس لا تصير بية
*****************
وكلما نسمع بزواج نروح ونصفن - ليش راحت هل البنية
بناتنا تزوجوا اغراب واولادنا ما يعرفون معنى العراقية
*****************
كل واحد بديرة ودار كل القارات امتلأت جاليات عراقية
وكل عائلة تفتفتت - الي مات شهيد الي انعدم والي هاجر بأمل يعود , أمل مثل السراب كلما يقترب منه يلاقيه بقعه وهمية
*****************
بس لا , خل يبقى الحلم موجود , يبقى ويانا حتى نموت حلم رجعتنا للعراق ولمتنا الاهلية
حلم حيتحقق يوم؟؟ مو اليوم ولا مئة يوم تمر , اجيال واجيال واحفادنا نورثهم حب العراق والرغبة بالعودة النهائية
*****************
يمكن ترجع العراق بعد سنين وسنين ارض ديانات ارض اصول ارض صوت واحد ارض الحرية
احفادنا يبنوها ويسمعون من اهلها حكايات ما ممنسية
*****************
العراق ذكريات ما منسية وتحياتي لكل عراقي وعراقيه

__________________